Pyetja: E dua një vajzë me qëllim të pastër, si t’i lutem All-llahut xh.sh. për këtë punë?

 

Përgjigjja (nga Dr. Shefqet Krasniqi): All-llahut a.z.v.xh. duhet lutur jo vetëm për këtë punë, por për të gjitha punët e kësaj bote.
Vëllezër dhe motra të nderuar lutjuni dhe drejtohuni All-llahut a.z.v.xh. me metoda të ndryshme por të lejuara në Islam. Të gjitha kthehen në një, me dua dhe lutje, ose falë namaz istihare për këtë rast, që All-llahu a.z.v.xh. të zgjedhë për ty atë që është më e mirë për ty, ngase ti në atë namaz I drejtohesh All-llahut xh.sh. me këto fjalë:

“O Zot, nëse kjo punë imja, është e dobishme për fenë dhe jetën time, për kohën e ashme dhe të ardhmen, ma mundëso realizimin e saj, ma lehtëso mua këtë dhe më beko në të. E nëse kjo punë është e dëmshme për fenë dhe jetën time, për kohën e tashme dhe të ardhmen, largoje këtë nga unë dhe më largo mua nga kjo e më përcakto mirësinë (mbarësinë) kudo që të jetë dhe më bëj të jem i kënaqur me të”. [Traansmeton Buariu (1162) nga Xhabir ibn Abdullahu r.a.].
Pra, ti mos u lut, por leja All-llahut xh.sh. ta zgjedhë më të mirën për ty, kurse ti thuaj: O Zot! Ti e di më mirë edhe pse unë po i nguli këmbët, sepse unë nuk e di ngase jam i paditur se çka është më mirë për mua e çka nuk është mirë për mua. T’i kërkosh kohët në të cilat më shumë pranohet lutja si p.sh. ndërmjet ezanit dhe ikametit, të falësh namaz në pjesën e tretë të natës. Kur të tjerët flejnë, atëherë ti drejtohu All-llahut xh.sh. me lutje të sinqertë.

Transmeton Buahriu dhe Muslimi nga Ebu Hurejra r.a. se i Dërguari i All-llahut s.a.v.s. ka thënë:
“Zoti ynë i Lartmadhërishëm zbret çdo natë në qiellin e kësaj bote, në pjesën e tretë dhe të mbramë të natës, dhe thotë:

“Kush më lutet mua që t’i përgjigjem! Kush kërkon prej Meje që t’i jap! Kush kërkon falje që t’i fali atij”. [Transmeton Buhariu (1145) dhe Muslimi (1769)].
Prandaj ata të cilët bëjnë mëkate, ata të cilët kanë nevoja, ata të cilët kanë probleme, e të gjithë ne kemi nevojë, atëherë zgjohuni në pjesën e tretë të natës dhe luteni All-llahun a.z.v.xh.. Ta lutësh All-llahun xh.sh. shumë dhe shpesh. Jo të thuash se njëherë e kam lutur dhe nuk ka asgjë nga kjo punë, por lute All-llahun xh.sh. pandërprerë. Lute All-llahun a.z.v.xh. derisa të realizohet dëshira jote, apo derisa All-llahu xh.sh. ta kompenson atë me ndonjë tjetër. Lute në namaz, lute edhe kur je në sexhde, madje edhe në gjuhën shqipe por kur je në namaz vullnetar (nafile) e jo në namaz të obliguar (farz).